З 5 па 11 мая 2025 года ў холе музея на тэрыторыі мемарыяльнага комплексу "Хатынь" прайшоў сумесны віртуальны выставачны праект "Трагедыя ў вёсцы Хацунь і акупацыйны рэжым на тэрыторыі Браншчыны". Гэты праект стаў яшчэ адным напамінам пра злачынствы нацызму і пра тое, якую цану заплацілі нашы народы за Перамогу.
Мемарыяльны комплекс "Хацунь", адкрыты ў 2011 годзе, прысвечаны памяці мірных жыхароў Браншчыны, знішчаных нацыстамі. Ён стаў сімвалам усіх спаленых вёсак Расіі. У экспазіцыі музея прадстаўлены карта знішчаных населеных пунктаў, а таксама электронныя матэрыялы, якія распавядаюць пра зверствы акупацыйнага рэжыму ў 22 рэгіёнах краіны.
У рамках выставы былі паказаны дакументальныя фільмы: "Без тэрміну даўнасці. Хацунь" (2022 г.) і кіначасопіс "Наш край" (1977 г.). Гэтыя матэрыялы нагадалі аб маштабах генацыду і падкрэслілі, што ў падобных злачынстваў не можа быць тэрміну даўнасці.
Мы выказваем падзяку супрацоўнікам мемарыяльнага комплексу "Хацунь" (філіял ДБУК "Бранскі дзяржаўны краязнаўчы музей") за прадастаўленыя матэрыялы і спадзяемся на працяг супрацоўніцтва.
Такія праекты — гэта не толькі даніна павагі мінуламу, але і важны ўклад у захаванне адзінства нашых народаў. Вайна сышла ў мінулае, але подзвіг — вечны. Мы будзем захоўваць яго ў сэрцах, як сімвал мужнасці, згуртаванасці і сілы духу!
